Дебар, 1 ноември 2023 (МИА) – Во дебарската единица за јавно здравје непречено се одвива имунизацијата против сезонски грип и до денеска аплицирани се 204 дози вакцини, главно кај хронични болни и повозрасни лица од 65 години.

-Од вкупно аплицираните 200 дози се бесплатни, додека само 4 се комерцијални. До сега на апликацијата vakcinacija.mk се пријавени над 300 лица. Имунизацијата се одвива без никаков проблем. Апелирам до граѓаните да се вкакцинираат бидејќи тоа е најдобрата заштита од сезонскиот грип, рече за МИА епидемиологот Ментор Мела.

Додава дека од досега вакцинираните, над 70 отсто се жители од општините Дебар и Центар Жупа, кои со својата активност ги покрива единицата, а останатиот процент се жители од подрачјето на Долна Река, општина Маврово Ростуше, како и граѓани жители на други градови кои во овој период се во нивните родни места, а кои во апликацијата го навеле Дебар како пункт за вакцинација.

Според Мела, како и изминатите години, со вакцина против сезонски грип очекуваат да бидат опфатени околу 500 лица. вт/мд/

Фото: МИА