Во Гевгелија изведба на монодрамата „Прво лице еднина“ од кумановскиот театар
Гевгелија, 20 август 2025 (МИА) - Вечер на програмата на манифестацијата „Гевгелија град на културата 2025“ е монодрамата „Прво лице еднина“ во изведба на актерката Владанка Крстевски од НУЦК „Трајко Прокопиев“- Куманово.
Како што се наведува во информацијата, објавена на општинската фејсбук страница, монодрамата е авторски текст на актерката Владанка Крстевски, инспириран од книгата „Добра ноќ за бунтовни девојчиња“ од Елена Фавили и Франческа Кавало. Претставата го прикажува процесот на една актерка која се соочува со изборот дали да ги оствари своите соништа приватно и професионално или да отстапи од нив.
Актерката Крстевски додава дека преку претставата се пренесува порака за жените кои секојдневно се борат и работат за семејствата, а често остануваат незабележани.
Режисерката на претставата, Драгана Гунин, истакнува дека претставата е лична и ја обработува позицијата на актерот во специфичните услови на македонската уметничка сцена, прикажувајќи повеќе женски ликови и нивните приказни. рт/дма/
Фото: Општина Гевгелија
