Велес, 4 јуни 2025 (МИА) - Во големата сала на Општина Велес попладнево  се одржа стручниот настан на тема „Од идентификација до интервенција: рана развојна проценка во пракса“. Настанот ги собра образовниот, здравствениот и стручниот кадар од Велес, со цел да се разговара за значењето на раната проценка и интервенција кај деца со развојни потешкотии. 

Предавачи на денешната дискусија беа д-р Биљана Аризанкоска Ефтимова – психијатар и м-р Анита Нацевска, специјален едукатор и рехабилитатор од Центарот за рехабилитација на патологија на вербалната комуникација – Скопје.

Аризанкоска Ефтимова психолог, истакна дека доцнењето во развојот кај децата често е поврзано со прекумерната изложеност на екрани и технологија и дека раната возраст од 0 до 3 и од 3 до 6 години е клучна. Тоа се два критични периода преку кои се спроведуваат посебни програми и колку порано се забележи доцнењето, толку поефикасна е интервенцијата.

Преку предавања и дискусии, учесниците имаа можност да разменат искуства, да учат едни од други и да придонесат кон заедничка цел – подобра иднина за децата.

Во дискусијата на собирот беше потенцирано дека матичните лекари се едни од главните водачи во процесот на рана детекција и упатување на децата со сомнеж за развојни потешкотии.

Меѓу присутните беа претставници од основните и средните училишта, воспитувачи, педагози и психолози од градинката „Димче Мирчев“, матични лекари, педијатри, стручни служби од Општата болница Велес, како и тимот од Центарот за стимулација, раст и развој „Старс“. Присуствуваа и логопед, психолог и специјален едукатор од Здравствениот дом, како и претставници од локалната самоуправа.

Настанот заврши со заеднички апел за поголема едукација, меѓусебна соработка и навремено дејствување, како предуслов за здрав и квалитетен развој на секое дете. ад/сст/

Фото МИА