Лондон, 29 јули 2024 (МИА) - Британската министерка за финансии, Рејчел Ривс денеска пред Долниот дом изјави дека на 30 октомври ќе го претстави новиот нацрт-буџет на земјата, пренесоа британските медиуми. 

Британската министерка за финансии, цитирана од „Скај њуз“, објави дека открила „црна дупка“ во расходниот дел од тековниот буџет на земјата, кој е во износ од 20 милијарди британски фунти (23,75 милијарди евра). Овој буџет е донесен на предлог на претходната влада на Велика Британија, формирана од Конзервативната партија. 

Во тековната финансиска година буџетскиот дефицит изнесува 4,5 отсто од бруто домашниот производ (БДП) на земјата. Ова е најниско ниво од периодот пред пандемијата, според британските медиуми. мс/

фото: ЕПА