Берлин, 25 март 2025 (МИА) - Владата на германскиот канцелар во заминување Олаф Шолц денеска и официјално поднесе оставка откако претседателот Франк-Валтер Штајнмаер и ги предаде соодветните документи, јави ДПА.

Според член 69 од германскиот Устав, канцеларот во заминување официјално е ослободен по конституирањето на новиот парламент. Сепак, Шолц и неговите 14 министри ќе останат на своите функции како привремени функционери до формирањето на следната влада.

Кабинетот на претседателот соопшти дека Штајнмаер веќе побарал од администрацијата на Шолц да продолжи со работата додека не биде сменета.

Пред да ги предаде сертификатите, Штајнмаер ја пофали владата на Шолц за нејзиното управување со кризи, потсетувајќи на пандемијата на коронавирус, на целосната инвазија на Русија на Украина и на војната во Појасот Газа.

„Како германска влада многу често моравте да дејствувате многу брзо и решително. Требаше да влегувате во непозната територија и да барате нови пристапи“, рече шефот на државата.

Тој додаде дека Владата на Шолц успеала да ги подобри одбранбените капацитети на Германија и дека направила максимални напори да обезбеди снабдување со енергија во текот на првата зима од војната во Украина. паг/

Фото: ЕПА