Мадрид, 14 март 2024 (МИА) - Шпанската лига ќе пријави расистички скандирања упатени кон играчот на Реал Мадрид, Винисиус Жуниор пред натпреварот на градскиот ривал Атлетико Мадрид во Лигата на шампионите против Интер.

Винисиус на социјалните мрежи сподели видео на кое се слушаат навивачите на Атлетико како скокаат и извикуваат „Шимпанзото Винисиус“, во пресрет на натпреварот против Интер во Мадрид, во реваншот од осминафиналето на Лигата на шампионите.

Бразилскиот фудбалер повика навивачите да бидат казнети и на социјалната мрежа Х напиша: „Се надевам дека веќе размислувавте за нивната казна“. На таа објава тој ги означи сметките на Европската фудбалска централа (УЕФА) и Лигата на шампионите.

-Тоа е тажна реалност бидејќи тоа се случува дури и на натпревари на кои не присуствувам, додаде Винисиус.

Шпанската лига соопшти дека ќе ги пријави инцидентите до обвинителството за злосторства од омраза и дека исто така ќе преземе мерки и покрај скандирањата што се случуваат на натпревар надвор од нејзината организација и надвор од стадионот.

Лигата изјави дека е целосно посветена фудбалот да биде место каде што нема омраза и дека немилосрдно ќе продолжи да ги гони сите дела на расизам, хомофобија, насилство и омраза, без оглед на конкуренцијата.

Имаше и обвинувања за скандирања против Винисиус пред натпреварот помеѓу Барселона и Наполи во вторникот во Лигата на шампионите.

„Кадена Сер“ објави видео на кое се слушаат навивачите на Барселона како скандираат: „Винисиус умри“, пред победата од 3:1. Слични скандирања се слушаат и на другите дерби натпревари меѓу двата клуба.

Винисиус е мета на расистички навреди откако дојде во Шпанија пред шест години. Навивачите често го навредуваат поради бојата на кожата, го нарекуваат мајмун, а минатата година симпатизерите на Атлетико закачија кукла со неговиот лик како виси на мостот во Мадрид, пред дербито во Кралскиот Куп.

На 26 март, Шпанија и Бразил ќе одиграат пријателски натпревар на стадионот на Реал како дел од заедничката борба против расизмот. дс

Фото: Фејсбук/Реал Мадрид