Демир Хисар, 18 јули 2025 (МИА) - Во рамки на фестивалот „Демир Хисар низ боите и звуците на уметноста “, во организација на Центарот за креативни индустрии – НЕБО и општината, вечер во Домот на културата „Илинден“ ќе гостува Велешкиот театар, чии актери ќе ја изведат преставата „Синиот портокал“ од Џо Пенхол, во режија на Александар Ивановски.

„Синиот портокал“ е македонска праизведба на истоимениот драмски текст на британскиот автор Џо Пенхол кој во своите драми се занимава со современиот социолошки контекст, а ликовите за кои пишува се индивидуи кои бараат себереализција во општеството кое робува на бирократизација и меѓучовечки ривализам.

Станува збор за саркастична комична пиеса, која се осврнува на расата, менталната болест и британскиот живот во 21-виот век. За првпат е поставена во 2000 година во Националниот Театар во Лондон и доживува голем успех освојувајќи ги наградите за најдобра драма на три престижни британски фестивали, соопштија од Општина Демир Хисар.

Во претставата настапуваат актерите Благојчо Стојанов, Жарко Спасовски и Фаик Мефаилоски.
Влезот за претставата во Домот на културата „Илинден“  е бесплатен, нагласија од Општина Демир Хисар.
мт/рп/

Фото: Општина Демир Хисар