Лондон, 2 ноември 2022 (МИА) - Британскиот министер за одбрана Бен Валас денеска соопшти дека воздухопловните сили на армијата на Велика Британија имаат повеќе борбени авиони Ф-35, отколку пилоти кои се обучени да управуваат со нив. Тој информираше дека проблемот со летачката обука е главната причина за недостигот од пилоти, јави Скај њуз. Како што појасни министерот, обуката трае дури осум години, а планирано е да биде од две до три. Валас нагласи дека една од причините за недостиг од пилоти е и тоа што американскиот ловец Ф-35 е нов тип на авион, па додаде оти војската на располагање има нешто повеќе од 20 авиони што вредат над 100 милиони фунти по парче. Авионот Ф-35 е еден од најскапите и најпрестижните во составот на британската војска и се смета дека придонесува за значајно унапредување на безбедносните способности на вооружените сили, поради неговите софистицирани радари, сензори и други делови од опремата. Велика Британија планира да набави 138 парчиња, но засега купи 27. бд/паг/