Киев, 7 февруари 2024 (МИА) - Европската унија очекува да и обезбеди на Украина 1.155.000 артилериски гранати до крајот на годината поради зголемениот капацитет на одбранбената индустрија на земјите-членки, изјави високиот претставник на ЕУ за надворешна политика и безбедност Жозеп Борел за време на заедничкиот брифинг со премиерот на Украина Денис Шмигал во Киев.

Борел истакна дека одбранбената индустрија на ЕУ продолжува да расте, а нејзиниот капацитет сега може да се каже дека е зголемен за 40 отсто. Тој, исто така, даде конкретна бројка во врска со муницијата за Украина, со очекувања од 1,155 милиони гранати да бидат обезбедени до крајот на оваа година.

Обраќајќи му се на премиерот Шмигал, шефот на европската дипломатија рече дека Украина треба да продолжи со реформскиот процес на својот пат кон ЕУ и покрај војната.

Претходно, естонскиот министер за одбрана Хано Певкур објави дека на неформалниот состанок на 31 јануари министрите за одбрана на ЕУ се согласиле да го исполнат ветувањето дека до крајот на оваа година ќе и достават на Украина еден милион артилериски гранати.

Певкур прецизираше дека до крајот на март Украина ќе добие повеќе од 500.000 артилериски гранати, а до крајот на годината повеќе од 1,1 милион. паг/

Фото: ЕПА