Ресен, 27 декември 2024 (МИА) - Општина Ресен приреди атрактивен дочек на Дедо Мраз кој во градот пристигна на градскиот стадион каде традиционално се одржува новогодишен базар.

Годинава одлучивме за нашите најмлади да приредиме невообичаен новогодишен настан, изјави за МИА, градоначалникот Јован Тозиевски.

-Дедо Мраз во Ресен пристигна со голем син балон кој слета на стадионот каде се одржуваше новогодишниот базар на кој беа изложени новогодишните изработки на дечињата од основните училишта, градинките, Домот на културата и Центарот за лицата со посебни потреби и општинско корисна работа. Големо беше изненадувањето за сите посетители, возрасни и деца кои имаа можност да се качат во балонот и заедно со него и да се сликаат во балонот. Мора да признам дека волшебна беше глетката да се види балонот опкружен со насмевки и џагор на дечињата кои добиваа подароци од Дедо Мразот кој ги донесе во балонот, истакна Тозиевски.

Според востановената традиција, градоначалникот Тозиевски за време на новогодишната ноќ ќе ги посети дежурните лица во ресенската полиција, пожарникарска служба и брзата помош. мт/сст/

Фото: МИА