Приштина, 8 мај 2024 (МИА) - Американскиот амбасадор во Приштина Џеф Ховениер денеска ја поздрави одлуката на Владата на Косово да ја олесни замената на српските возачки дозволи за косовски возачки дозволи како и нивното издавање.

Тој на платформата Икс напиша дека САД ги поддржуваат оние напори кои овозможуваат понатамошна интеграција и подобрување на заедничката визија за инклузивно и мултиетничко Косово.

„САД ја поздравуваат одлуката на косовската влада да го олесни издавањето косовски возачки дозволи за сите граѓани на Косово. Ги поддржуваме напорите што овозможуваат понатамошна интеграција и унапредување на нашата заедничка визија за инклузивно, мултиетничко Косово“, напиша Ховениер.

Со одлука на Министерството за внатрешни работи на Косово, сите Срби кои живеат во Косово од 9 мај до 9 август годинава можат да ги заменат српските возачки дозволи за косовски дозволи. ссм/