Тел Авив, 28 јануари 2025 (МИА) - Израелскиот премиер Бенјамин Нетанјаху планира следната недела да го посети Вашингтон и да оствари средба со американскиот претседател Доналд Трамп, јавија светските агенции, повикувајќи се на текст во Аксиос.

Доколку веста биде потврдена, Нетанјаху ќе биде првиот странски лидер што ќе се сретне со Трамп во Вашингтон од неговата инаугурација на 20 јануари.

Трамп, истовремено, ја повтори желбата да ги види Палестинците од Газа да живеат без насилство и рече дека наскоро ќе разговара за тоа со израелскиот премиер во Вашингтон, пренесоа француските медиуми.

-Би сакал да живеат во еден регион каде што би можеле да живеат без превирања, без револуција и без насилство, рече Трамп во авионот што се враќаше од Флорида.

„Појасот Газа беше пекол толку многу години. Мислам дека луѓето би можеле да живеат во многу побезбедни зони и многу поудобно“, додаде тој.

Запрашан дали сè уште верува во решение со две држави за израелско-палестинскиот конфликт, Трамп рече: „Ќе разговарам со Нетанјаху во не толку далечна иднина. Тој ќе биде тука“, но не наведе датуми.сд/

фото:МИА архива