Shkup, 25 mars 2026 (MIA) - Qyteti i Shkupit do të sigurojë ndihmë financiare të njëhershme për pacientët onkologjikë në kuadër të Programit për aktivitete në fushën e kujdesit social, të fëmijëve dhe shëndetësor për vitin 2026.

Sipas vendimit, të drejtë për këtë ndihmë kanë personat që banojnë në zonën e qytetit, përkatësisht në komunat Aerodrom, Butel, Gazi Babë, Gjorçe Petrov, Karposh, Kisella Vodë, Saraj, Qendër, Çair dhe Shuto Orizare.

Për realizimin e të drejtës, është e nevojshme të paraqitet një kërkesë së bashku me të gjithë dokumentacionin, duke përfshirë një kopje të kartës së identitetit, një dokument nga një autoritet kompetent që konfirmon diagnozën, llogarinë transaksionale të aplikantit dhe konfirmimin se personi bën pjesë në kategorinë e pacientit onkologjik. Dokumentacioni nuk duhet të jetë më i vjetër se gjashtë muaj nga diagnoza.

Kërkesat dorëzohen përmes Arkivit të Qytetit të Shkupit, në një zarf të mbyllur me shënimin "Sektori për Veprime Publike - Komisioni për Dhënien e Ndihmës Financiare të Njëhershme për Pacientët Onkologjikë".

Kryetari i Qytetit të Shkupit, Orce Gjorgjievski në profilin e tij në Fejsbuk theksoi se kjo masë është një simbol i solidaritetit dhe mbështetjes.

"Ky është një mesazh se askush nuk është vetëm. Se pas çdo beteje qëndron dikush që beson, bashkëndjen dhe ndihmon. Se edhe në ditët më të vështira ka një dorë që do t'ju mbështesë dhe shpresë që nuk shuhet kurrë", shkroi kryetari i Qytetit të Shkupit. ls/

Foto:Fejsbuk, Orce Gjeorgjievski