Varshavë, 25 mars 2026 (MIA) - Ministri i Punëve të Jashtme dhe Tregtisë së Jashtme, Timço Mucunski, sot, me ftesë të Zëvendëskryeministrit dhe Ministër i Punëve të Jashtme të Republikës së Polonisë, Radosłav Sikorski, qëndroi për vizitë pune në Varshavë.

Në takimin me nikoqirin e tij, Ministri Mucunski shprehu kënaqësi për nivelin e lartë të zhvillimit të marrëdhënieve të Maqedonisë-Polonisë, të cilat janë vendosur fort në një rrugë pozitive, si dhe për miqësinë e sinqertë dhe vlerat e përbashkëta që të dy vendet i kanë kultivuar për më shumë se tre dekada. Ai theksoi se kjo paraqet një bazë të fortë për rritje të vazhdueshme dhe përparim të bashkëpunimit të përgjithshëm, kumtoi Ministria e Punëve të Jashtme dhe Tregtisë së Jashtme.

Të dy ministrat ranë dakord që në periudhën e ardhshme, fokus i rëndësishëm do t'i kushtohet thellimit të bashkëpunimit ekonomik, rritjes së shkëmbimit tregtar dhe tërheqjes së investimeve të reja polake në vend.

Një pjesë e rëndësishme e bisedimeve iu kushtua procesit të integrimit evropian, ku Ministri Mucunski falënderoi Poloninë për mbështetjen e vazhdueshme. Ai theksoi se Polonia është një nga mbështetëset më të qëndrueshme dhe më të zëshme të politikës së zgjerimit të Bashkimit Evropian, duke treguar angazhimin e saj aktiv në formate të shumta, duke përfshirë Grupin e Vishegradit, Grupin e "Miqve të Zgjerimit" dhe Trekëndëshin e Vajmarit.

Bashkëbiseduesit diskutuan edhe për bashkëpunimin e shkëlqyer si vende-aleate të NATO-s, si dhe çështjet aktuale rajonale, globale dhe të sigurisë.

Gjatë konferencës së përbashkët për shtyp, Ministri Mucunski theksoi se partneriteti midis dy vendeve është rezultat i më shumë se tre dekadave besim, bashkëpunim dhe një vizioni të përbashkët.

"Sot e konfirmuam atë partneritet dhe hodhëm themelet për thellimin e tij të mëtejshëm - veçanërisht në ekonomi dhe tregti, si shtylla kryesore të marrëdhënieve tona", deklaroi ministri Mucunski.

Në kuadër të vizitës së tij në Varshavë, Ministri Mucunski u takua edhe me kryetaren e Komisionit të BE-së në Sejm, Agnjeshka Pomaska, ku diskutuan për procesin e integrimit evropian të vendit, si dhe rëndësinë e bashkëpunimit parlamentar në avancimin e marrëdhënieve dypalëshe. ls/

Foto: MPJdheTJ