Москва, 15 ноември 2024 (МИА) - Видео платформата „Јутјуб“ (YouTube) од вчера повторно функционира нормално во Русија, откако во последните месеци работеше многу бавно. Платформата работеше нормално откако претседателот Владимир Путин му вети на истакнат директор дека ќе го реши проблемот, објавија руските медиуми.

Руските корисници почнаа да пријавуваат проблеми со „Јутјуб“, во сопственост на американскиот гигант Google, летото откако руските власти се заканија дека ќе ја забават услугата.

Властите, кои веќе ја блокираа или забавија работата на неколку американски социјални мрежи во земјата, го критикуваа „Гугл“ (Google) дека не дозволува пристап до „Јутјуб“ за руските канали обвинети за пропаганда.

Вечерта руските медиуми објавија дека платформата повторно работи нормално. Според „Глобал Чек“ (GlobalCheck), кој ја следи цензурата на Интернет, Јутјуб е целосно достапен за сите големи руски интернет провајдери.

Од почетокот на конфликтот во Украина во 2022 година, руските власти ја зајакнаа контролата на Интернет, забранувајќи голем број западни веб-страници и социјални мрежи каде нивните критичари можеа слободно да го изразат своето мислење, како што се Фејсбук, Инстаграм и Х. На почетокот на октомври ја забранија и платформата за дискусија „Дискорд“. Сепак, овие ресурси сè уште се достапни од Русија преку виртуелни приватни мрежи (ВПН), средство за заобиколување што исто така го следат властите. мс/

фото: МИА архива