Сеул, 14 јуни 2023 (МИА) - Јужна Кореја денеска поднесе тужба против Северна Кореја за отштета од 44,7 милијарди вони (32 милиони евра) заради минирањето на заедничката канцеларија за врски, што се наоѓа северно од нивната заедничка граница, во 2020 година, јави Хина.

Симболичната тужба, поднесена во јужнокорејскиот Централен окружен суд во Сеул, доаѓа во време на долгогодишни затегнати односи и зголемена загриженост во врска со нуклеарното оружје и ракетната програма на Северна Кореја.

Јужна Кореја имаше рок до петок да побара компензација за штетата, кога истекува тригодишниот статут за застареност на делото.

Портпаролот на Министерството за обединување, кое се занимава со односите со Северна Кореја, Ку Бјунгсам, денеска изјави дека севернокорејското минирање на зградата е незаконско и насилно дело што ги прекршува договорите и „фундаментално ги оштети темелите на меѓусебното почитување и доверба“.

Не постои јасен начин Јужна Кореја да ја принуди Северна Кореја да плати репарации, доколку судот во Сеул утврди дека соседот е одговорен за експлозијата и штетата.

Ку додаде дека тужбата, прва што една јужнокорејска Влада ја поднела против севернокорејската Влада, има за цел да го зачува законското право на Јужна Кореја на компензација.

Во јуни 2020 година, Северна Кореја со експлозив ја разнесе канцеларијата за врски на Јужна Кореја во пограничниот град Каесонг, откако го критикуваше неуспехот на Јужна Кореја да ги спречи севернокорејските дезертери да испраќаат пропагандни летоци преку границата користејќи балони.

Зградата во време на детонацијата веќе беше празна бидејќи Северна Кореја ја затвори канцеларијата во јануари 2020 година, кога ја затвори и границата поради појава на коронавирусот. сд/

North Korea blew up an office set up to foster better ties with South Korea in a ‘terrific explosion’ after expressing anger at defectors sending what it called propaganda from the South https://t.co/9jtZOhHyIW pic.twitter.com/LafBUDGHI5

— Reuters (@Reuters) June 16, 2020