Јакин: Целосно доминиравме против Италија и постигнавме голови во вистински моменти
- Репрезентацијата на Швајцарија доминираше во секој дел од играта против Италија и оствари заслужена победа од 2:0 во осминафиналето на Европското фудбалско првенство, изјави селекторот Мурат Јакин, цитиран од сајтот на УЕФА.
![Јакин: Целосно доминиравме против Италија и постигнавме голови во вистински моменти](https://mia.mk/index.php/images/20240629220814_big_730x400_16.webp )
Берлин, 29 јуни 2024 (МИА) - Репрезентацијата на Швајцарија доминираше во секој дел од играта против Италија и оствари заслужена победа од 2:0 во осминафиналето на Европското фудбалско првенство, изјави селекторот Мурат Јакин, цитиран од сајтот на УЕФА.
- Победивме исклучително важен натпревар и среќни сме. Не сум задоволен само од резултатот, туку и од нашата игра. Целосно доминиравме на теренот и постигнавме голови во вистински моменти, изјави швајцарскиот селектор по победата против Италија.
Според Јакин, „крстоносците“ се во прилично добра форма, но не треба да „летаат на небото“.
-Расположението во нашата соблекувална е одлично и мило ми е што можеме да се фокусираме на игрите, без ништо да ни го одвлече вниманието. Ситуацијата е фантастична и играчите работат многу професионално. Имаме неколку дена да се подготвиме за следниот противник. Ќе почнеме да планираме кога ќе го дознаеме името на противникот. Сепак, големиот фокус секогаш е на самите себе како тим, порача селекторот. дс
Фото: Архива