Јавен повик за ангажирање лични асистенти на ученици со посебни образовни потреби во општина Центар
- За кандидатите кои ќе бидат избрани и вклучени во проектот, се предвидува паричен надоместок во висина од петнаесет илјади денари - нето-износ, со вклучен данок на личен доход и осигурување за инвалидност и телесно оштетување предизвикано од повреда на работа и професионална болест.
![Јавен повик за ангажирање лични асистенти на ученици со посебни образовни потреби во општина Центар](https://mia.mk/index.php/images/20240120121805_big_730x400_8.webp )
Скопје, 20 јануари 2024 (МИА) - Општина Центар го распиша јавниот повик за ангажирање на лични асистенти во проектот „Образование за сите“ за потребите на ученици со посебни образовни потреби, кои имаат потреба од помош и придружба во текот на наставата во второто полугодие, од учебната 2023/2024 година, информираат од локалната самоуправа.
- Заинтересираните кандидати треба да ги исполнуваат следните услови: минимум завршено средно образование, претходно искуство во работа со деца со посебни образовни потреби, долгорочно невработени лица - над 12 месеци во евиденција, со предност на невработени лица над пет години, млади лица до 29 години, лица постари од 50 години, самохрани родители и родители на деца со попреченост, се наведува во соопштението.
Општината напоменува дека предност ќе имаат кандидатите кои имаат завршено високо образование: дипломиран наставник по предметна/одделенска настава, дипломиран психолог, дипломиран педагог, дипломиран дефектолог или дипломиран социјален работник, имаат искуство во работа како лични - образовни асистенти во претходните циклуси на проекти, поседуваат лиценца за личен асистент на лица со попреченост издадена од овластена институција.
- Заинтересираните лица кои ќе бидат вклучени во проектот „Образование за сите“, ќе бидат работно ангажирани како лични асистенти на ученици со посебни образовни потреби, вклучени во образовниот процес во основните училишта на територија на општина Центар-Скопје, во второто полугодие од учебната 2023/2024 година. Тие ќе имаат скратено работно време од дваесет работни часа неделно, во период од пет месеци, почнувајќи од 1 февруари 2024 година до крајот на учебната 2023/2024 година, се додава во соопштението.
За кандидатите кои ќе бидат избрани и вклучени во проектот, се предвидува паричен надоместок во висина од петнаесет илјади денари - нето-износ, со вклучен данок на личен доход и осигурување за инвалидност и телесно оштетување предизвикано од повреда на работа и професионална болест.
- Лицата кои сакаат да аплицираат за учество, треба да приложат барање за учество во проект „Образование за сите“, професионална кратка биографија, потврда од Агенцијата за вработување - доколку кандидатот е невработено лице евидентирано во Агенцијата на Република Северна Македонија, доказ за завршено образование - копија, потврда за претходно работно искуство со лица со попреченост - доколку кандидатот поседува таква, лиценца за личен асистент на лица со попреченост - доколку кандидатот поседува таква, се појаснува во соопштението.
Барањето за учество во проектот, заедно со потребната придружна документација, може да се поднесе во архивата на Општина Центар - барака „6“, од 9 до 15 часот.
Јавниот повик е достапен на веб-страницата на општината и на огласните табли на општинските основни училишта. бд/бак/
Фото: Општина Центар