Штип, 4 ноември 2024 (МИА) - Нови паркинг површини добива населбата Сењак во Штип. Градоначалникот на Општина Штип, Иван Јорданов на денешната прес-конференција информира дека на овој простор претходно имало лимени гаражи и со нивно отстранување просторот е рационално искористен, со што жителите ќе добијат и нови паркинг места, уреден простор и место кое ќе можат да го користат пред станбените згради.

Општина Штип за реализација на овој проект  издвои нешто повеќе од два милиони денари.

- Се работи на асфалтирање на паркинг површина која ја оформивме откако претходно се отстранија лимени гаражи. Истата рационално е искористена, ќе има повеќе паркинг површини, урбана опрема, со цел да се користи оваа локација од страна на граѓаните, вели Јорданов.

Во наредниот период ќе се работи и на останати локации во Штип. Ќе се прават планови за уредување и согласно истите етапно ќе се отстрануваат лимените гаражи, кои се поставени на јавна површина.

- Сите времени објекти кои се на јавна површина и онаму каде во даден момент ќе се одвиваат одредени активности добиваат известување за да бидат отстранети. Етапно работиме и  секаде каде имаме планирано некоја содржина претходно се известуваат сопствениците да ги отстранат своите лимени гаражи, рече  Јорданов.

Тој посочи дека остануваат уште неколку локации кои треба да бидат уредени и асфалтирани во наредниот период. вдј/цр

Фото: МИА