Бризбејн, 3 јануари 2020 (МИА) - Канадскиот тим стана првиот тим што победи на тимскиот натпревар во првото издание на новиот АТП куп. Канаѓаните ја совладаа Грција со 3: 0 во Бризбејн и ја предводат својата група, во која се наоѓаат и екипите на Германија и Австралија. Турнирот започна одлично за Канаѓаните со голема победа на нивната sвезда Денис Шаповалов над минатогодишниот шампион на финалниот АТП турнир - Стефанос Циципас. Шаповалов го постигна престижниот успех по 7:6 (6), 7:6 (4) над светскиот број 6. Малку подоцна, Канада си го загарантира успехот со јасна победа на нивниот втор рекет, Феликс Оже-Алијасим, над Михаил Перволаракис од Грција - 6: 1, 6: 3. Во последниот натпревар од овој судир во парови, Шаповалов и Алијасим ги совладаа Перволаракис и Петрос Циципас - помладиот брат на Стефанос, 6:2, 6: 3 за 68 минути. - Дефинитивно е голема победа за мене. Стефанос минатата сезона имаше неверојатна последна фаза. Тој е еден од најдобрите играчи во светот. Тој има неверојатни вештини. Да се ​​победи таков играч во првиот натпревар од годината е специјално за мене, тоа значи навистина многу, прокоментира Шаповалов по неговиот успех над Стефанос Циципас. Канада одмара утре, а во недела Шаповалов и компанија се соочуваат со домаќините од Австралија, додека Грција се соочува со Германија.