Берлин, 10 јуни 2024 (МИА) - Претседателот на УЕФА, Александар Чеферин не гледа конкретни закани по безбедноста на претстојното ЕП 2024 во Германија, но е загрижен за геополитичката ситуација воопшто.

-Немаме конкретни безбедносни проблеми. Но, безбедносен проблем за мене е сложената геополитичка ситуација во светот. Се повеќе насилство. Сè повеќе агресија. Генерално, ситуацијата во светот не е идеална, рече Чеферин во интервју за германска агенција.

Словенецот додаде дека токму поради геополитичката ситуација е добро што Европското првенство повторно ќе се одржува во една земја, а не на целиот континент, како што беше во 2021 година.

-За нас е многу полесно да работиме со една полиција и една тајна служба во една земја, во споредба со турнир во повеќе земји. Секогаш е предизвик да се организира голем настан како Европско првенство, поради зголемената опасноста по безбедноста. Во овој аспект веројатно е поголем предизвик од организирањето на Олимпијадата. Добро соработуваме со германските власти. Ја посетив министерката за внатрешни работи, Ненси Фезер, во Берлин и претходно разговаравме неколку пати. Сите соработуваат, додаде Чеферин.

Германските политичари ветија дека турнирот ќе биде максимално безбеден за сите, а Ненси Фезер викендов откри дека 22.000 полицајци ќе работат само за Европското првенство секој ден.

Фезер, исто така, им порача на Германците и посетителите да одат и да уживаат во турнирот, а Чеферин се согласи бидејќи „фудбалот е една од ретките работи што сè уште може да ги зближи луѓето“.

-Навистина мислам дека ова може да биде голем фестивал на пријателството, рече тој. дс

Фото: Архива