ЦУК: Вкупно 25 пожари на отворено за изминатите 24 часа, два сѐ уште активни
- Во текот на вчерашниот ден имаше вкупно 25 пожари на отворен простор, од кои, два се сѐ уште активни, а уште толку се под контрола, информираат утрово од Центарот за управување со кризи (ЦУК).
![ЦУК: Вкупно 25 пожари на отворено за изминатите 24 часа, два сѐ уште активни](https://mia.mk/index.php/images/20240827090126_big_730x400_26.webp )
Скопје, 27 август 2024 (МИА) - Во текот на вчерашниот ден имаше вкупно 25 пожари на отворен простор, од кои, два се сѐ уште активни, а уште толку се под контрола, информираат утрово од Центарот за управување со кризи (ЦУК).
- На планината Мукос, место викано „Котева круша“, во атар на село Оморани, огнот е изгаснат од дожд, додека, активен е кон селото Степанци и место викано „Кадиица“ на границата помеѓу општините Чашка и Долнени, каде гори мешана шума, се појаснува во соопштението.
Вториот активен пожар е на територија на општина Студеничани, над селото Црвена Вода, место викано „Крста“. Горат ниска вегетација и нискостеблеста шума.
Под контрола е пожарот во општина Кичево, кај селото Цер, каде гори веќе на изгорениот дел, но нема опасност од проширување.
Вториот пожар, категоризиран „под контрола“, е на планината Галичица, кај место викано „Зли Дол“. Дождот го изгаснал пожарот на ресенска страна. бд/вг/
Фото: МИА архива