Њујорк, 28 јуни 2022 (МИА) - Цените на нафтата денеска пораснаа на трета последователна трговска сесија поради неизвесностите поврзани со глобалното производство, кои се закануваат дополнително да ја заострат понудата на пазарот.

Членовите на нафтената алијанса ОПЕК + треба да се состанат оваа недела за да разговараат за ситуацијата со снабдувањето.

Цената на северноморската нафта од типот „Брент“ се зголеми за 1,18 отсто на 116,5 долари за барел, а американската нафта WTI зајакна за 1,02 отсто на 110,8 долари за барел.

Либија има се повеќе проблеми со извозот на „црното злато“ поради влошувањето на политичката криза, додека антивладините протести во Еквадор се закануваат да го прекинат производството во таа поранешна членка на Организацијата на земји извознички на нафта (ОПЕК), пренесува „Блумберг“.

Секое нарушување на снабдувањето може да се прошири како концентрични кругови на глобалниот пазар на нафта, кој, под притисок на силната побарувачка, е поттикнат од економското закрепнување и затегнатите трговски текови од Русија по нејзиниот напад врз Украина.

Некои членки на групата ОПЕК +, која ја сочинуваат земјите од ОПЕК и нивните сојузници на чело со Русија, не ги исполнуваат целите за производство за оваа година, што ја влошува состојбата на пазарот. паг/