Хутите упаднаа во просториите на ОН во Сана, и го запленија дури и мебелот
- Јеменските бунтовници Хути упаднаа во седиштето на Канцеларијата на Обединетите нации за човекови права во Сана и запленија документи, возила, па дури и мебел.
![Хутите упаднаа во просториите на ОН во Сана, и го запленија дури и мебелот](https://mia.mk/index.php/images/20240813155813_big_730x400_52.webp )
Сана, 13 август 2024 (МИА) - Јеменските бунтовници Хути упаднаа во седиштето на Канцеларијата на Обединетите нации за човекови права во Сана и запленија документи, возила, па дури и мебел.
Високиот комесар на ОН за човекови права Волкер Турк објави дека бунтовниците тоа го направиле на 3 август и побарал „силите на Ансар Алах (Движењето Хути) да ги напуштат просториите и веднаш да вратат сè“, но портпаролот на бунтовниците не одговорил на новинарското прашање во врска со тоа.
Канцеларијата на ОН за човекови права претходно ги прекина своите операции на делови од територијата контролирана од Хутите.
Во јуни, Хутите заробија повеќе од 60 луѓе кои работеа со ОН и други невладини организации, објави тогаш Канцеларијата на ОН за човекови права, а бунтовниците рекоа дека се припадници на „американско-израелската шпионска мрежа“.
Хутите со месеци напаѓаат бродови во Црвеното Море во близина на брегот на Јемен, велејќи дека го поддржуваат палестинското движење Хамас во Појасот Газа, против кое војува Израел. рп/
Фото: МИА архива