Берлин, 23 февруари 2022 (МИА) - Министерот за економија на Германија Роберт Хабек изјави дека државата може да функционира и без руски гас, но дека тоа нема да биде лесно.

Европската индустриска централа моментално се потпира на руската компанија „Газпром“ за повеќе од половина од својот гас. Добавувачот број 2, Норвешка веќе работи со целосна сила, а Германија нема средства за увоз на течен товар.

Министерот Хабек денеска изјави за радиото Дојчландфунк дека „можноста Германија да добие доволно гас и ресурси надвор од увозот на руски гас постои“.

Тој говореше откако канцеларот Олаф Шолц ефективно го замрзна одобрувањето на рускиот гасовод „Северен поток 2“ до Европа во услови на драматична ескалација на тензиите меѓу Русија и Западот околу Украина.

Хабек предупреди на „премногу шпекулации“, велејќи дека енергетските врски со Русија ги преживеале претходните кризи. Тој, исто така, рече дека прекинот на процесот на сертификација на „Северен поток 2“ не значи дека „гасоводот засекогаш е надвор од масата за преговори“. паг/