Франција ја враќа својата амбасада од Лавов во Киев
- Франција денеска соопшти дека нејзината амбасада во Украина ќе се врати во главниот град Киев од западниот град Лавов, каде што беше преместена на почетокот на март по руската инвазија.
![Франција ја враќа својата амбасада од Лавов во Киев](https://mia.mk/index.php/images/20221113111005_big_730x400_29.webp )
Париз, 14 април 2022 (МИА) - Франција денеска соопшти дека нејзината амбасада во Украина ќе се врати во главниот град Киев од западниот град Лавов, каде што беше преместена на почетокот на март по руската инвазија.
„Ова преместување ќе се случи многу наскоро и ќе и овозможи на Франција дополнително да ја продлабочи својата поддршка за Украина во сите области со цел да се спротивстави на војната што ја започна Русија на 24 февруари“, се вели во соопштението на Министерството за надворешни работи.
Францускиот министер за надворешни работи Жан-Ив Ле Дриан го соопшти ова за време на телефонскиот разговор со неговиот украински колега Дмитро Кулеба.
Официјален Париз продолжува да ги советува своите граѓани да не се враќаат во Украина, вклучително и во Киев.
Франција ја поддржува Украина преку воена опрема, хуманитарна помош и помош во истрагата за злоупотребите, наводно, извршени од руските сили врз украинските цивили.
Француската влада додели 100 милиони евра хуманитарна помош за Украина и соседните земји, вклучувајќи ги Полска и Молдавија, кои примија многу украински бегалци. ссм/