Манчестер, 17 март 2025 (МИА) - Напаѓачот на Манчестер Сити, Фил Фоден, верува дека освојувањето на ФА Купот и завршувањето меѓу четирите најдобри во Премиер лигата ќе ја „спаси слаба сезона“ и ќе ги подготви за повторно да ја предизвикаат титулата следната сезона.

Деветте првенствени порази го оставија тимот на Пеп Гвардиола 22 бода зад лидерот Ливерпул и во борба за пласман во топ 4 откако беше исфрлен од Лигата на шампионите од Реал Мадрид во нокаут фазата. ФА Купот и Светското клупско првенство по крајот на сезоната се единствените почести кои остануваат на располагање на Сити.

Иако ниту една од нив нема да биде на врвот на листата во август, Фоден рече дека треба да земат нешто од разочарувачката кампања.

-Ова е важно. Чувствувам дека ако го освоиме ФА Купот и завршиме меѓу првите четири, ќе ја спасиме лошата сезона во моите очи. Сега една од нашите главни цели е да се погрижиме да играме во Лигата на шампионите следната сезона. Во наши раце е. Ни треба малку повеќе самодоверба. Не ни беше цел да бидеме овде на почетокот на сезоната, но понекогаш тоа е фудбалот, никогаш не се знае што ќе се случи зад аголот. Секогаш има тимови кои се подобруваат и нè предизвикуваат. И да, имавме малку „пролизгувања“ оваа сезона, но сепак можеме да ја завршиме силно и да ја спасиме сезоната, изјави Фоуден.

За осум години, фудбалерот освои шест првенствени титули, Лигата на шампионите, два ФА купа и четири Лига купови во речиси невиден златен период за еден играч од академијата.

Кога успехот станува норма, неуспехот се чувствува уште поакутно, а Фоден рече дека тоа довело до ново ценење на она што го постигнал.

-Сто проценти. Ако некогаш повторно освојам нешто, ќе се обидам да уживам во тоа уште повеќе, бидејќи тоа покажува колку брзо работите можат да се променат. Тоа што го правевме во минатото не е нормално, па покажува какво ниво на фудбал беше поставено и колку е тешко да се направи она што го постигнавме. Луѓето имаат такви сезони и прашање е како ќе се вратите. Не можете секогаш да бидете на врвот и тоа се случува, тоа е дел од фудбалот. Ќе има подеми и падови, па дефинитивно ќе бидам среќен ако освојам повеќе работи во иднина, додаде фудбалерот. дс

Фото: Архива