Филипче до Гир: Се сомневам во намерите на Владата да го продолжи европскиот пат
- Како што информираат од СДСМ, во разговорот Филипче истакнал сомнеж околу намерите на Владата воопшто да го продолжи стратешкиот правец кон Европската Унија и го информирал Гир дека СДСМ како опозиција ќе се залага за реформи и јасни перспективи.
![Филипче до Гир: Се сомневам во намерите на Владата да го продолжи европскиот пат](https://mia.mk/index.php/images/20240806163904_big_730x400_58.webp )
Скопје, 6 август 2024 (МИА) - Досегашниот мандат на евроамбасадорот и случувањата во земјата биле во фокусот на денешната средба на претседателот на СДСМ, Венко Филипче, со Дејвид Гир, чиј мандат како амбасадор на Европската Унија во Северна Македонија завршува.
Како што информираат од СДСМ, во разговорот Филипче истакнал сомнеж околу намерите на Владата воопшто да го продолжи стратешкиот правец кон Европската Унија.
- Загрижен сум дека политиките на новата Влада може да предизвикаат трајно блокирање на евроинтеграциските процеси. Владата на ВМРО-ДПМНЕ во само неколку недели целосно ги наруши позициите на Северна Македонија, отворајќи веќе затворени спорови со што шансите за продолжување на евроинтеграциите драматично се влошија, истакнал Филипче на средбата со Гир.
Тој го информирал евроамбасадорот дека СДСМ како опозиција ќе се залага за реформи и јасни перспективи.
- Европската интеграција е стратешка цел на државата и СДСМ ќе продолжи да се залага за негување на демократските вредности и заштитата на националните интереси. СДСМ како опозиција ќе се залага за реформи од страна на сите чинители во македонското општество. Напредокот во интеграцијата на нашата држава позитивно ќе се одрази на регионалната соработка, стабилноста и напредокот на земјата, рече Филипче.
Претседателот на СДСМ му се заблагодарил на Гир за неговата посветеност и работа во земјава. ар/са/
Фото: СДСМ