Турција предничи во светот според сопственоста на дигитални валути, Аргентина веднаш зад неа
- „Генерално, постои поголема тенденција да се прифаќаат криптовалути во земји со капитални ограничувања и финансиска и политичка нестабилност“, велат аналитичарите од истражувачката компанија K33 Research.
![Турција предничи во светот според сопственоста на дигитални валути, Аргентина веднаш зад неа](https://mia.mk/index.php/images/20230502120844_big_730x400_89.webp )
Лондон, 2 мај 2023 (МИА) - Нестабилните криптовалути стануваат, по се изгледа, сигурни засолништа за капиталот во некои делови од светот, како што се Аргентина и Турција, каде високата инфлација и падот на локалните валути ги принудија граѓаните да бараат спас во дигиталните пари, наведува Хина.
Во однос на сопственоста на дигиталните валути во светот, Турција предничи со удел од 27,1 отсто, а по неа е Аргентина со 23,5 отсто, што е значително повисока од проценетата глобална стапка од 11,9 отсто, покажуваат податоците од истражувачката фирма GWI.
Покрај водечките позиции во светот во усвојувањето криптовалути, заедничко за Турција и Аргентина е тоа што имаат и висока инфлација, што доведе до пад на курсевите на националните валути и контрола на протокот на капитал со цел да се обесхрабри локалното население да изнесуваат пари во странство. Годишната стапка на инфлација во Турција во март достигна 50,51 отсто, а во Аргентина дури 104 отсто.
Турската лира и аргентинскиот пезос вртоглаво паѓаат и се на рекордно ниско ниво. На црниот пазар, на пример, треба да се издвојат околу 464 пезоси за американски долар, што е повеќе од двојно од официјалниот девизен курс од 222 пезоси за долар.
Голем дел од купувањето на таканаречените безбедни засолништа е криптовалутите како USD Coin (USDC) и Tether (USDT), кои се крипто токени поврзани еден-на-еден со традиционалните средства како американскиот долар или златото, што им овозможува на инвеститорите алтернатива кога нема доволно долари.
„Без разлика дали се работи за инвеститори на мало или институционални инвеститори, луѓето размислуваат како да се заштитиме од падот на вредноста на валутата“, рече Ехаб Заглул, главен истражувач во Tribal Credit, платформа за дигитални плаќања за стартапи на пазарите во развој. „Тие потенцијално сакаат да држат дополнителни средства врзани за посилна валута, така што нешто како USDC или USDT или што било поврзано со посилна валута како американскиот долар“, додаде тој.
Обемот на тргување со парот USDT-турска лира достигна повеќемесечен максимум минатата недела, поттикнат од слабеењето на турската валута и претстојните клучни претседателски и парламентарни избори, рече аналитичарката на Kaiko, Десислава Оберт.
„Генерално, постои поголема тенденција да се прифаќаат криптовалути во земји со капитални ограничувања и финансиска и политичка нестабилност“, велат аналитичарите од истражувачката компанија K33 Research. ссм/
фото: МИА архива