Територијалната противпожарна единица од Кочани го одбележа Денот на пожарникарите
- Со симболично постројување и смотра на пожарникарите што ја изврши градоначалникот на Кочани, Николчо Илијев, Територијалната противпожарна единица од Кочани денеска го одбележа 20 Мај - Дено
![Територијалната противпожарна единица од Кочани го одбележа Денот на пожарникарите](https://mia.mk/index.php/images/20221103221045_big_730x400_77.webp )
Кочани, 20 мај 2020 (МИА) – Со симболично постројување и смотра на пожарникарите што ја изврши градоначалникот на Кочани, Николчо Илијев, Територијалната противпожарна единица од Кочани денеска го одбележа 20 Мај - Денот на пожарникарството.
Поради превентивните мерки против коронавирусот, присутните носеа заштитни маски, а изостана вообичаената свеченост и присуството на претставници од општинската администрација, пензионирани пожарникари и други гости.
Командирот на кочанските пожарникари, Благој Паунов, во својот рапорт истакна дека и покрај големиот број интервенции, минатата година успешно се справиле со сите предизвици.
- Имавме над 330 интервенции на терен, главно за гасење пожари во шуми и на запалени стрништа, а се вклучивме и во општинската акција за дезинфекција на влезовите на станбените згради, на фабричките хали и на други јавни простори, како заштита од коронавирусот. Наша оценка е дека и покрај недоволниот број пожарникари и опрема со кои располагаме, успешно ги исполнивме поставените задачи и во интервенциите во периодот меѓу двете празнувања имавме само материјална штета, без повредени и жертви, истакна Паунов.
Градоначалникот Николчо Илијев искажа задоволство од работењето на територијалната противпожарна единица, истакнувајќи ги заложбите за нејзино постојано опремување.
-Во рамки на можностите на локалната самоуправа помагаме во делот на опременоста на единица, така што лани набавивме специјални огноотпорни чизми и поткапи. За годинава веќе се обезбедени средства во општинскиот буџет за набавка на уште едно теренско противпожарно возило, истакна Илијев.
Во рамки на одбележувањето на Денот на пожарникарството, за најуспешен пожарникар за изминатиот едногодишен период беше прогласен Сашо Мијалов, кој доби награда од градоначалникот. та/ир