Спасовски: МВР со експлицитна порака за никаква толеранција на било која форма на нечовечко однесување и постапување
- На мое големо задоволство денеска земав учество на завршниот настан во рамки на проектот „Елиминација од тортура и нечовечко постапување во затворите и другите установи за лишување од слобода
![Спасовски: МВР со експлицитна порака за никаква толеранција на било која форма на нечовечко однесување и постапување](https://mia.mk/index.php/images/20221108173307_big_730x400_88.webp )
Скопје, 29 септември 2021 (МИА) - На мое големо задоволство денеска земав учество на завршниот настан во рамки на проектот „Елиминација од тортура и нечовечко постапување во затворите и другите установи за лишување од слобода“, финансиран од ЕУ, а имплементиран од Македонското здружение на млади правници и Хелсиншкиот комитет за човекови права,во чија што реализација крајно транспарентно и одговорно партиципираше МВР, преку својот Оддел за внатрешна контрола, криминалистички истраги и професионални стандарди, што јасно говори за нашата решеност да продолжиме во реформското трансформирање на полицијата како реален и кредибилен сервис на сите граѓани.
Ова го напиша министерот за внатрешни работи Оливер Спасовски на неговиот официјален фејсбук профил, каде нагласува и дека правото на слобода и правото на заштита од сите видови на мачење, нечовечко постапување и тортура е едно од основните човекови права, кое нема ограничување.
- Оттука, би сакал да нотирам дека МВР во изминатиот период направи сериозни и мерливи напори и презеде активности, не само во поглед на почитување на принципите што го сочинуваат корпусот на човекови права и слободи, туку и за нивна конкретна заштита во доменот на полициското постапување. Практично, и во организациски и во оперативен смисол, полицијата демонстрираше подготвеност и волја да се заложи за подинамично и квалитетно имлементирање на сите сугестии, стандарди и процедури во насока на етаблирање на заштитата на човековите права и слободи, објави Спасовски.
Покрај низата проекти во кои полицијата активно учествуваше, заедно со нашите партнерти од ЕУ, од Советот на Европа, од ОБСЕ - МВР, појаснува Спасовски, во 2018 година ја ревидираше, односно надогради и Стандардната оперативна процедура за полициско постапување. Притоа, вели, примарниот фокус беше ставен кон зајакнување на капацитетите за правилна и доследна примена на законските и подзаконските акти во примената на полициските овластувања.
- Како водечко начело, МВР во континуитет презема и ќе продолжи да презема мерки за подобрување на состојбата - со експлицитна порака за никаква толеранција на било која форма на нечовечко однесување и постапување, напиша министерот за внатрешни работи Спасовски на фејсбук. цр/дма/
![Спасовски 4](/articles/images/%d1%81%d0%bf%d0%b0%d1%81%d0%be%d0%b2%d1%81%d0%ba%d0%b8-%d0%bc%d0%b2%d1/ZF5MsT6Ml/placeholder.webp?use_watermark=0)
![Спасовски 3](/articles/images/%d1%81%d0%bf%d0%b0%d1%81%d0%be%d0%b2%d1%81%d0%ba%d0%b8-%d0%bc%d0%b2%d1/RKap8XXLR/placeholder.webp?use_watermark=0)