Сеул, 14 август 2025 (МИА) - Силни дождови го погодија главниот град на Јужна Кореја денеска втор ден по ред, при што загина најмалку едно лице, се поплавија или оштетија стотици патишта и домови, а повеќе од 1.000 луѓе беа принудени да се евакуираат.

Утрово во делови од Сеул и околните градови Паџу, Инчеон и Гимпо паднаа околу 250-300 милиметри дожд, оставајќи автомобили заглавени на патиштата што се претворија во реки, а жителите спасуваат работи од имотите оштетени од ненадејните поплави.

Властите издадоа предупредувања за поплави и свлечишта во областите во близина на реки, потоци и ридови, а службите за итни случаи спасија најмалку 145 луѓе и одговорија на стотици пријави за оштетени патишта. Снабдувањето со електрична енергија беше вратено на околу 4.000 домаќинства кои беа без електрична енергија во текот на ноќта до утрово, соопшти Министерството за внатрешни работи и безбедност.

Јужнокорејската метеоролошка агенција соопшти дека обилните дождови ќе продолжат да го погодуваат регионот на Сеул до утрово. Властите затворија десетици паркови покрај реки и повеќе од 100 планинарски патеки, а исто така испратија и СМС-пораки со кои ги предупредија луѓето да внимаваат на поплави, лизгање на земјиштето и оштетени згради. Дождот не ги попречи летовите. мс/

фото: ЕПА архива