Седница на Извршниот одбор на ЛДП: Партијата се приклучува кон Европската коалиција
- Извршниот одбор на Либерално-Демократската партија (ЛДП) вечерва донесе одлука за приклучување кон Европската коалиција, што, како што се наведува во партиското соопштение, е составена од партии кои се залагаат за полноправна интеграција во Европската унија.
![Седница на Извршниот одбор на ЛДП: Партијата се приклучува кон Европската коалиција](https://mia.mk/index.php/images/20231211223703_big_730x400_16.webp )
Скопје, 11 декември 2023 (МИА) - Извршниот одбор на Либерално-Демократската партија (ЛДП) вечерва донесе одлука за приклучување кон Европската коалиција, што, како што се наведува во партиското соопштение, е составена од партии кои се залагаат за полноправна интеграција во Европската унија.
-Согласно стратешките определби на државата, одлучивме на следните избори партијата да биде дел од Европска коалиција. За Република Северна Македонија не постои друг пат освен брзо приклучување кон европското семејство. Од таа причина, како партија која постојано работи во интерес на граѓаните, се наведува во соопштението од партијата.
Од Извршниот одбор на партијата посочуваат дека е јасно оти политичките партии во трка за поен плус и од популизам не можат да постигнат консензус за спроведување на големи реформи во клучни области, и дека оттука е неопходно да се почне процесот на преговори низ кои ќе се реформира државата.
На седницата на ИО, за шеф на Централниот изборен штаб на ЛДП, е предложен генералниот секретар Боби Мојсоски.
ИО на седницата формираше и група за програмски преговори во рамки на претстојната Коалиција, што е предводена од потпретседателот Валентин Груевски, претседателката на Форумот на жени - Билјана Аврамоска Ѓореска, претседателката на ЛиДеМ - Јелена Мишиќ и член на ИО - Горан Петрушев.
-Не постои друга алтернатива за земјата, како од политички, така и од економски аспект освен полноправно членство во ЕУ. Целта е брзи реформи, за видлив напредок дома. Мнозинството од граѓаните се за членство во унијата каде и природно припаѓаме, се посочува во соопштението од Либерално демократска партија. ев/