Русија поднесе жалба против Германија поради истрагата за „Северен тек 2“
- Шефот на европскиот оддел во Министерството за надворешни работи на Русија, Олег Тјапкин, изјави дека Русија официјално поднела тужба против Германија поради истрагата за саботажите на „Северен тек 2“ и инсистира да одржи разговори за исполнување на Берлин на неговите меѓународни обврски во борбата против тероризмот.
![Русија поднесе жалба против Германија поради истрагата за „Северен тек 2“](https://mia.mk/index.php/images/20240819090403_big_730x400_21.webp )
Москва, 19 август 2024 (МИА) - Шефот на европскиот оддел во Министерството за надворешни работи на Русија, Олег Тјапкин, изјави дека Русија официјално поднела жалба против Германија поради истрагата за саботажите на „Северен тек 2“ и инсистира да одржи разговори за исполнување на Берлин на неговите меѓународни обврски во борбата против тероризмот.
Во интервју за „РИА Новости“, кое го пренесуваат германските медиуми, Тјапкин потсети дека германските власти издале потерница за еден од наводните извршители на саботажата, кој е украински државјанин.
- Судејќи според тоа што германските медиуми долго и методично ја промовираат тезата дека овие лица не се поврзани со ниту една држава, германската истрага исто така ќе биде затворена без идентификација на вистинските нарачатели на саботажата на ‘Северен тек 2’, рече Тјапкин.
Тој исто така изрази мислење дека Германија ќе го забави целиот случај, како што веќе направија Данска и Шведска во февруари оваа година.
Во врска со ова, Тјапкин изјави дека Русија поставила прашање за исполнување на обврските што произлегуваат од конвенциите на ОН против тероризмот.
- Релевантните тврдења се официјално претставени билатерално и на Берлин. Ние се стремиме да водиме преговори во согласност со важечките меѓународни прописи. Нашите понатамошни чекори ќе зависат од реакцијата на западните земји“, изјави Тјапкин.
Според медиумската истрага на неколку германски новински куќи, која беше објавена пред неколку дена, германските власти издале налог за апсење на украински државјанин поради саботажа на гасоводот „Северен тек“. Инструктор по нуркање, претставен едноставно како Володимир З., последен пат бил виден во полскиот град западно од Варшава, но неговото тековно место на живеење не е познато, наведува истрагата на „АРД“, „Зидојче Цајтунг“ и „Ди Цајт“.
Ова е прв налог за апсење издаден во врска со експлозиите во 2022 година на гасоводите кои ја поврзуваат Германија со Русија преку Балтичкото Море. Федералното обвинителство одби да ги коментира наводите. ссм/
фото: архива