Вашингтон, 24 април 2024 (МИА) - На универзитетите ширум САД демонстрациите против израелската политика за ставање крај на убиствата на палестинските цивили во Појасот Газа стануваат се помасовни.

Протестите се зголемуваат по масовните апсења на демонстранти на неколку универзитети на источниот брег на САД.

Демонстрантите бараат универзитетските фондации да се одвојат од израелските интереси и САД да ја прекинат или барем да ја условат израелската воена помош со подобрување на состојбата на Палестинците.

Големиот уличен протест во Њујорк беше прекинат во вторникот кога њујоршката полиција почна да апси учесници поради непристојно однесување.

Советот за американско-исламски односи ја критикуваше употребата на полициска сила за задушување на протестот, велејќи дека тоа ја поткопува академската слобода.

Критичарите на протестот, вклучително и истакнати републикански претставници во Конгресот на САД, ги обвинија демонстрантите за антисемитизам и малтретирање, додека организациите за човекови права изразија загриженост за ограничувањето на слободата на говорот.

Во квартот Бруклин во Њујорк, околу 2.000 луѓе се собраа во близина на куќата на лидерот на демократите во Сенатот Чак Шумер, силен поддржувач на Израел и највисоко рангиран еврејски политичар во американската администрација, извикувајќи: „Престанете да го вооружувате Израел!“, „Стоп за финансирањето геноцид“ и „Да живее Газа!“.

Њујоршката полиција уапси повеќе од 120 демонстранти на Универзитетот во Њујорк во понеделникот и повеќе од 100 на Универзитетот Колумбија минатата недела.

Овој универзитет ја откажа наставата во својот кампус на Менхетен во понеделникот во обид да ги смири тензиите и во вторникот рече дека часовите ќе бидат онлајн.

Студенти од Калифорнискиот универзитет во Беркли поставија шатори во знак на солидарност со демонстрантите во другите училишта. паг/

Фото: ЕПА