Приземјувачот „Одисеј“ е оперативен петти ден на Месечината
- Се очекува контакт со „Одисеј“ да биде изгубен денеска. Компанијата ја извести јавноста дека научната опрема на леталото ќе биде оперативна околу девет до 10 дена.
![Приземјувачот „Одисеј“ е оперативен петти ден на Месечината](https://mia.mk/index.php/images/20240228125856_big_730x400_29.webp )
Хјустон, 28 февруари 2024 (МИА) - Американскиот месечев приземјувач „Одисеј“, на својот петти ден на површината на Месечината, e сè уште во функција - според последните податоци на приватната вселенска компанија „Интуитив машинс“, која управува со леталото.
Се очекува контактот да биде изгубен денеска. Компанијата во петокот - ден откако приземјувачот се спушти на Јужниот Пол на Месечината, ја извести јавноста дека научната опрема на леталото, според „најдоброто сценарио“ - ќе биде оперативна околу девет до 10 дена. „Одисеј“ е првото летало коешто слета на Месечината а е управувано од приватна компанија.
Компанијата соопшти и дека лендерот слетал странично на површината на Месечината по грешка во навигацијата, ограничувајќи ја изложеноста на сончевите панели на достапна сончева светлина.
Мисијата „Одисеја“ е дел од програмата за комерцијални услуги на НАСА, при што агенцијата им плаќа на приватни американски компании за превоз и пренос до Месечината. Во овој случај, НАСА ѝ плаќа на „Интуитив машинс“ 118 милиони долари. си/ссм/
Фото: „Интуитив машинс“