Претседателот Пендаровски на средба со претставници од ромската заедница
- Во пресрет на Меѓународниот ден на Ромите, претседателот Стево Пендаровски денеска оствари средба со Љатифа Шиковска, пратеничка во Собранието, Неждет Мустафа, претседател на Обединетата парт
![Претседателот Пендаровски на средба со претставници од ромската заедница](https://mia.mk/index.php/images/20221107012410_big_730x400_66.webp )
Скопје, 8 април 2021 (МИА) – Во пресрет на Меѓународниот ден на Ромите, претседателот Стево Пендаровски денеска оствари средба со Љатифа Шиковска, пратеничка во Собранието, Неждет Мустафа, претседател на Обединетата партија за еднаквост на Ромите – ОПЕР, Зоран Димов и Шенај Османов, претставници на Мрежата за застапување за трајни и системски решенија за интеграција на Ромите, со цел да се запознае со состојбите поврзани со ромската заедница.
На средбата, како што соопшти кабинетот на Пендаровски, било дискутирано за актуелните предизвици за интеграцијата на ромската заедница во општеството, како и за приоритетните активности за подобрување на положбата на Ромите во земјата.
Соговорниците за време на средбата го запознале претседателот на државата со тековните процеси поврзани со евидентирање на лицата без документација, подобрување на домувањето во ромските населби, зголемување на можностите за вработување, како и со застапувањето трајни системски решенија во насока на побрзо вклучување и интеграција на Ромите во државата.
Претседателот Пендаровски им го честита Меѓународниот ден на Ромите, посочувајќи дека ромската заедница претставува нераскинлив дел од општеството заедно со сите други народи во земјата. Тој истакна дека во насока на подобрување на состојбата на Ромите во општеството, ја изразува поддршката за заеднички ангажман на сите чинители во државата водејќи се по принципот на недискриминација, еднаквост и владеење на правото. ки/дма/