Дубаи, 8 декември 2023 (МИА) - Султан ал-Џабер, претседателот на климатскиот самит КОП28, денеска ги повика земјите да излезат од своите „удобни зони“ и да работат заедно за да постигнат договор пред состанокот да заврши на 12 декември.

- Ве молам, ајде да ја завршиме работата. Мора да се искажете и ве замолувам да излезете од вашата комфорна зона, рече Ал Џабер на отворањето на пленарната седница откако самитот влезе во најтешката фаза од преговорите.

На само пет дена до крајот на состанокот за климата, речиси 200 земји допрва треба да се договорат за најболното прашање - фосилните горива, иако е познато дека нивната употреба е главната причина за глобалното затоплување.

Во моментов, најмалку 80 земји бараат на Самитот да се дојде до договор со кој ќе се бара прекин на употребата на фосилни горива. Ако тоа се случи, тоа ќе биде преседан по тридецениските самити на ОН за климата каде што идната улога на фосилните горива не е дискутирана на овој начин.

Во меѓувреме, источноевропските земји се обидуваат да го решат ќор-сокакот околу следниот домаќин на самитот за климата, КОП29, откако Русија објави дека нема да дозволи ниту една членка на ЕУ да претседава со самитот.

Од денеска како кандидат се спомнува Азербејџан, а Молдавија и Србија, исто така, доставија понуди за ротирачкото претседателство. ссм/

фото: ДПА