Скопје, 21 април 2024 (МИА) - Во Младинскиот културен Центар во Скопје денеска ќе се одржи натпревар на 110 ученици од СУГС „Димитар Влахов“ и СУГС „Шаип Јусуф“ од прва, втора и трета година занимање фризер.

Натпреварот на кој учениците ќе се натпреваруваат во три категории и тоа: машко потстрижување, креативни фризури, свечени фризури и креативно обликување на коса, е организиран од Секцијата на фризери при Занаетчиска комора Скопје.

Целта на настанот, соопштија од Секцијата на фризери при Занаетчиска комора Скопје, е да се даде значење на стручното образование во образовниот систем, кој формално им овозможува на учениците да се стекнат со вештини и компетенции и им овозможува вработување по завршување во средното стручно образование. Со активно учество во образовниот процес на мајсторите и менторите занаетчии во оспособување на идниот кадар во струката, се додава, се добива иден квалитетен кадар спремен за вработување и самовработување.

- Стручното образование има задача да воспостави систем кој обезбедува висок квалитет на учење и можности за стекнување на квалификации (знаење, вештини и компетенции) во согласност со потребите на пазарот, да ја намали невработеноста, и ги задоволи потребите на пазарот на трудот со што ќе придонесе за економски, општествен и личен развој, се посочува во соопштението.

Настанот е од натпреварувачки карактер и за учениците се обезбедени награди. цр/

Фото: Секција на фризери при Занаетчиска комора Скопје