Очилата со ВИ набргу ќе им дадат „супермоќи“ на луѓето
- Од одредени морално-етички причини, би можело да се очекуваат и барања за забрана на таква технологија.
![Очилата со ВИ набргу ќе им дадат „супермоќи“ на луѓето](https://mia.mk/index.php/images/20230627131038_big_730x400_24.webp )
Лос Анџелес, 27 јуни 2023 (МИА) - Очилата опремени со вештачка интелигенција во блиска иднина ќе им дадат „супермоќи“ на луѓето, на пример - способност да знаат кога некој ги лаже или некого привлекуваат.
Иако сѐ ова на мнозина им изгледа како научна фантастика, футуристот Девин Лидел е убеден дека технологијата сѐ побргу ќе напредува. Во изјава за „Дејли мејл“, Лидел вели дека компјутерските системи за вид вградени во очилата ќе можат да ги соберат емоционалните знаци и нијанси што се невидливи со голо око. Тој верува дека оваа проширена реалност во комбинација со ВИ „ќе го пробрази општествениот пејзаж“ за луѓето.
- Во иднина технологијата ќе може да им помогне на луѓето да откријат секакви физиолошки и психолошки информации за другите луѓе, како на пр. кога некој лаже или дали Вашиот партнер е навистина заљубен во Вас. Очилата би можеле да бидат исклучително клучни во многу области од нашиот живот, а тие „суперсили“ ќе може да се користат во сите видови општествени односи, од политички преговори до работа, па дури и излегување на состанок, вели Лидел.
Според него, рана употреба ќе резултира со сценарија каде што само една личност има супермоќи, што би било неправедно кон другата личност, па фер ќе биде ако секој да добие такви очила.
Од одредени морално-етички причини, би можело да се очекуваат и барања за забрана на таква технологија. Но, стручњакот вели дека со соодветна регулација, таа би можела да стане и помала и поевтина, но и достапна за повеќе луѓе. си/сд/