Отворен повик за 23 позиции за асистенти за нега на стари лица во Делчево
- Во Делчево е отворен јавен повик за 23 позиции за мерката 7.2 за обука и вработување на лица за обезбедување услуги на грижа во заедницата, имплементирана од Агенцијата за вработување во парт
![Отворен повик за 23 позиции за асистенти за нега на стари лица во Делчево](https://mia.mk/index.php/images/20221112134216_big_730x400_17.webp )
Делчево, 28 февруари 2022 (МИА) - Во Делчево е отворен јавен повик за 23 позиции за мерката 7.2 за обука и вработување на лица за обезбедување услуги на грижа во заедницата, имплементирана од Агенцијата за вработување во партнерство со УНДП – Швајцарската агенција за развој и соработка. Согласно повикот, за девет работни позиции заинтересираните ќе можат да аплицираат преку Хуманитарното здружение за помош и поддршка на лица со посебни потреби „Бравура кооператива“ Делчево, додека апликации за останатите14 позиции ќе можат да се поднесат преку Црвен крст Делчево.
-Јавниот повик се однесува на три евидентирани невработени лица за вклучување во бесплатни обуки за палијативен неговател за болни и изнемоштени лица, шест позиции за асистенти/негователи за испорачување на услуга одмена на семејна грижа. Во однос на останатите 14 позиции, обуката е наменета за асистенти за нега на лица со Алцхајмерова болест, стои во јавниот повик на АВРСМ.
Обуката ќе се реализира во период од три месеци организирана во неколку модули и фокусирана на теоретски и практичен дел.
-Лицата вклучени во обуките ќе добијат месечен надомест од 9.000 денари, со вклучено осигурување за инвалидност и телесно оштетување причинето со повреда на работа и професионалнa болест и данок на личен доход за времетраењето на обуката, додаваат од Агенцијата за вработување.
Невработените лица кои ќе ја завршат обуката и успешно ќе го положат предвидениот испит, ќе се стекнат со Сертификат издаден од верификуваните спроведувачи на обука пропишан од Министерство за образование и наука. Заинтересираните невработени лица можат да го изразат својот интерес и/или да поднесат пријава во Центрите за вработување, секој работен ден од 09:00 до 14:00 часот. Детални информации за мерката може да се добијат во надлежниот Центар за вработување. вс/вј/