Отворено јубилејното 35. издание на интернационалниот поетски фестивал Поетска ноќ во Велестово
- Пред рекорден број посетители синоќа во живописното Велестово беше отворено јубилејното 35. издание на интернационалниот поетски фестивал Поетска ноќ во Велестово.
![Отворено јубилејното 35. издание на интернационалниот поетски фестивал Поетска ноќ во Велестово](https://mia.mk/index.php/images/20230819122254_big_730x400_26.webp )
Скопје, 19 август 2023 (МИА) - Јубилејното 35. издание на интернационалниот поетски фестивал Поетска ноќ во Велестово синоќа беше отворено пред рекорден број посетители.
Во фокусот беше македонската поезија пишувана од жени. Беше промовирана книгата „Самодиви: панорама на македонската поезија пишувана од жени, од преродбата до денес“, а настапија: Весна Ацевска, Виолета Танчева-Златева, Лидија Димковска, Снежана Стојчевска, Љубица Шопова, Сузана Мицева, Павлина Атанасова и Марија Велинова.
Следуваше интернационално поетско читање на кое настапија: Феликс Шилер (Германија), Шпетим Селмани (Косово), Албан Туфа (Албанија), Марија Костиќ (Србија) и Перица Сарџоски (Македонија). Потем беше отворена и изложбата „Минливост“ на уметникот Тони Попов во тремот на црквата „Успение на Пресвета Богородица.“
На програмата на фестивалот за денеска е предвидена промоцијата на книгата: „Ново раѓање на зборот: антологија на младата македонска поезија“, од приредувачите Весна Мојсова-Чепишевска и Иван Антоновски, како и интернационалното поетско читање „Поезија ‒ Залез“. Настаните се закажани за 17:00, односно 18:00 часот во Конгресниот центар на УКИМ во Охрид.
Фестивалот го овозможија: Општина Охрид, РЕАД (Регионална Мрежа за Културна Разновидност) и Европската Унија, Министерството за култура и Комерцијална банка. ир/хс/
Фото: МИА