Османи од Туркменистан ја продолжува посетата на Централна Азија
- Претседавачот со ОБСЕ и министер за надворешни работи, Бујар Османи, по реализирањето на посетите на Узбекистан и Казахстан во август оваа година, утре ќе престојува во работна посета на Туркменистан.
![Османи од Туркменистан ја продолжува посетата на Централна Азија](https://mia.mk/index.php/images/20231008161716_big_730x400_23.webp )
Скопје, 8 октомври 2023 (МИА) - Претседавачот со ОБСЕ и министер за надворешни работи, Бујар Османи, по реализирањето на посетите на Узбекистан и Казахстан во август оваа година, утре ќе престојува во работна посета на Туркменистан.
Како што соопшти МНР, посетата на Туркменистан е во рамки на остварувањето на дел од главните заложби од Програмата за Претседавањето на Северна Македонија со ОБСЕ во 2023 година и поддршка на работата на теренските операции на ОБСЕ во земјите-учеснички од Централна Азија (ЦА).
Османи во Ашгабат, ќе има средби со претседателот на Туркменистан, Сердар Бердимухамедов, министерот за надворешни работи, Рашид Мередов со кого ќе има и прес-конференција, Гурбангули Бердимухамедов, претседателот на Народниот совет на Туркменистан и Дунјагозел Гулманова, претседателка на Парламентот. Покрај средбите со државниот врв, Османи ќе реализира средби и со граѓански организации, претставници на Центарот на ОБСЕ во Ашгабат и резидентни амбасадори на земјите-учеснички на ОБСЕ и партнери од други меѓународни организации.
-Соработката на теренските мисии на ОБСЕ во земјите од Централна Азија е од големо значење за ублажување на последиците од воената агресија на Русија врз Украина. Исто така, Регионот на Централна Азија е директно изложен на последиците од хуманитарната криза и севкупната ситуација во Авганистан. Рамката за акција на ОБСЕ им помага на земјите-учеснички од овој регион за соодветен одговор на ситуацијата во насока на ублажување на ризиците за неговата стабилност,. стои во соопштението од МНР. вг/
Фото: МИА Архива