Крива Паланка, 28 декември 2023 (МИА) – Општина Крива Паланка денес додели плакети за најуспешните работници и поединци во текот на 2023 година, во повеќе области.

Плакетите ги доделија градоначалникот, Сашко Митовски и претседателката на Советот на Општина Крива Паланка, Изабела Павловска.

- Честитки за добитниците на признанијата-најуспешни во 2023 година. Овие признанија нека претставуваат поттик за поголема лична мотивација, пожртвуваност, одговорност и посветеност кон работните задачи, а ваквиот принцип на работа да се применува во секој момент и да се покаже на дело во средината во која работиме и живееме, истакна градоначалникот Митовски.

Традиционално, плакети беа доделени за најуспешен пожарникар, најдобар полициски службеник, најдобар комунален работник од ЈП „Комуналец“, додека по првпат годинава беа доделени плакети за: најдобар воспитувач од градинката „Детелинка“, најдобар спортист и најдобар земјоделец во општина Крива Паланка за 2023 година.

Митовски нагласи дека заложбите и професионалноста во извршување на работните задачи, во работата и областа во која се најдобри, се гордост и на општината но и на нивните работни колективи, тимови и на колегите.

Признанија добија: Драган Маџовски – најуспешен пожарникар од ТППЕ Крива Паланка, Даниел Младеновски, најдобар полициски службеник од ПС ОВР Крива Паланка, Мане Ѓоргиевски – најдобар комунален работник во ЈП Комуналец, Лидија Златановска, најдобар воспитувач од ОЈУ детска градинка „Детелинка“, Вукашин Јовановиќ, најдобар млад спортист и Габриела Стојановска – најдобар земјоделец за 2023 година. ид/ир

Фото: Општина Крива Паланка