Скопје, 14 ноември 2022 (МИА) - Локомотива – Центар за нови иницијативи во уметноста и културата од 2020-та година е членка на Европската мрежа за танцови куќи - ЕДН и како членка на оваа мрежа организира онлајн конференција насловена „Како можеме да се придвижиме? Еколошки перспективи во современиот танц“. Во 2022 година, фокусот на Европската мрежа за танцови куќи е одржливоста во секторот на современиот танц, како во однос на еколошката одржливост, така и на одржливоста на танцовите организации и танцовите практичари. Како што наведуваат од Локомотива, оваа конференција ќе биде одлична можност за учесниците од и надвор од мрежата и секторот да се вклучат во разговор со поканетите гости говорници уметници, креатори на политики, професионалци за танц за да се дискутираат и решат горливите прашања за танцовиот сектор, општеството и културата пошироко. Европската мрежа за танцови куќи го проширува своето влијание со цвојот нов проект EDNext 2022 - 2024 година, финансиран од Креативна Европа, кој придонесува за поодржлив и инклузивен европски танцов сектор преку широк опсег на активности, градење капацитети, вмрежување, размена на знаења и истражување и застапување. ев/мд/