Нова група деца од Општина Кисела Вода замина на бесплатно летување во Охрид
- Нова група деца утрово замина на спортски камп на брегот на Охридското Езеро. Преку оваа мерка на Општина Кисела Вода бесплатно летување е овозможено на вкупно 165 дечиња.
![Нова група деца од Општина Кисела Вода замина на бесплатно летување во Охрид](https://mia.mk/index.php/images/20240819095217_big_730x400_7.webp )
Скопје, 19 август 2024 (МИА) - Нова група деца утрово замина на спортски камп на брегот на Охридското Езеро. Преку оваа мерка на Општина Кисела Вода бесплатно летување е овозможено на вкупно 165 дечиња.
Како што информира денеска Општина Кисела Вода, градоначалникот Орце Ѓорѓиевски им посака среќен пат на спортистите од младинските категории од спортските клубови од Oпштината и на основците од социјален ризик кои наредните седум дена бесплатно ќе летуваат и ќе се дружат.
- Денескa испративме уште една група на млади спортисти и ученици од социјален ризик на спортски камп на брегот на Охридското Езеро. Овој бесплатен седумдневен камп е многу повеќе од обично летување. Tој претставува одлична можност децата да се социјализираат, да создадат нови пријателства и да ги развиваат своите спортски таленти, изјави Ѓорѓиевски.
Според него, преку вакви активности децата не само што ќе ги усовршат своите спортски вештини, туку ќе научат и важни животни лекции за тимска работа, дисциплина и посветеност.
- Наша обврска е да продолжиме да ги поддржуваме и мотивираме младите спортисти, а оваа иницијатива е само дел од нашата континуирана стратегија за промоција на спортски активности и здрав начин на живот меѓу младите. На ова гледам и како на начин да се спречи маргинализацијата на децата од социјално-загрозените семејства. Сите деца, без разлика на нивната социјална позадина заслужуваат еднаква шанса за успех и развој, нагласи Ѓорѓиевски. мд/са/
Фото: Општина Кисела Вода