Куманово, 28 декември 2023 (МИА) - Дечињата од градинката „Ангел Шајче“, вработените и родителите донираа пакетчиња, играчки за нивните другарчиња кои празниците ќе ги поминат на детското одделение во кумановската општа болница. Претставници од градинката денеска ги однесоа подароците и остварија традиционална средба со надлежните од болницата.
- Последната недела во тековната година ја насловивме „Недела на дарување“ и последна акција која се реализира во болницата е именувана „Да даруваме и сите да се радуваме“. Активноста е реализирана на работилници, подаривме играчки за нашите другари од детскиот оддел. Им посакуваме да оздрават и да си одат дома, изјави директорката на градинката, Марина Алексовска.

На овој начин појаснува уште од најрана возраст се поттикнува емпатијата, најважните вредности, благодарноста, дарежливоста, срдечноста и љубезноста. Дечињата се едуцираат преку вакви активности да не бидат себични и да покажат емпатија и да подарат играчки на непознати дечиња.

Директорката на болницата, Биљана Ивановска се заблагодари на надлежните кои ја реализираа новогодишната акција.

- Како општество треба да се фокусираме на децата од најрана возраст да развиваме солидарност и емпатија. Очекувам да продолжиме со соработката помеѓу двете установи. И ние бевме гости кај нив за време на неделата на децата. Се надевам на идна успешна соработка, изјави Ивановска. ам/ир

Фото: МИА