Вашингтон, 16 март 2025 (МИА) - Во американските напади во Јемен загинаа најмалку 24 лица, а повеќе од 20 се повредени, соопшти денеска Министерството за здравство на Хутите.

Најмалку 13 лица загинаа во вчерашните американски напади, а девет се повредени во американските напади врз јеменската престолнина Сана, додека уште десет загинаа, а 13 се повредени во северната провинција Саада, соопшти Министерството, пренесува денеска Си-Ен-Ен.

Во Саада, нападите биле насочени кон електрана во градот Дахјан, што предизвикало прекин на електричната енергија во градот и неговите предградија, објави телевизијата Ал Масира, управувана од Хутите.

Американскиот претседател Доналд Трамп изјави дека наредил „решителна“ воена акција против Хутите во Јемен.

Во објавата на платформата „TruthSocial“, тој рече дека САД ќе распоредат „масовна смртоносна сила“ против Хутите додека не ја постигнат својата цел, обвинувајќи ја групата за „немилосрдна кампања на пиратство, насилство и тероризам против американските и другите бродови, авиони и беспилотни летала“.

 Тој рече дека американскиот персонал извршува воздушни напади врз базите на Хутите, лидерите и противракетната одбрана „за да ги заштити американските поморски, воздушни и поморски средства и да ја врати слободата на навигација“.

 Трамп го одобри планот за напад на Хутите кон крајот на минатата недела, а конечната наредба за почеток на нападите беше издадена вчера, што официјалните лица го опишуваат како континуиран напад врз позициите на групата во Јемен.сд/

фото:МИА архива