Маричиќ: Македонската и бугарската страна да не дозволат споровите да станат поголема пречка
- Македонската и бугарската страна да не дозволат споровите во наредниот период да станат уште поголема пречка, бидејќи тоа ќе влијае долгорочно и на нашите односи, но и на идните односи во Уни
![Маричиќ: Македонската и бугарската страна да не дозволат споровите да станат поголема пречка](https://mia.mk/index.php/images/20221128064309_big_730x400_28.webp )
Скопје, 19 ноември 2022 (МИА) - Македонската и бугарската страна да не дозволат споровите во наредниот период да станат уште поголема пречка, бидејќи тоа ќе влијае долгорочно и на нашите односи, но и на идните односи во Унијата и регионот, порача вицепремиерот за европски прашања, Бојан Маричиќ.
Маричиќ, кој зборуваше на панелот „Западен Балкан и проширувањето на ЕУ – одраз на руската агресија врз Украина“ во рамки на „Балканскиот интегративен форум 2022“, изрази верување дека и бугарските политичари имаат извлечено поука од прашањето Северна Македонија.
Тој рече дека имаме добри сојузници во Бугарија, во сите политички партии, но за жал сè уште тензијата и антикампањата е голема, а врзана е, оцени, и за она што се случува во Украина.
-Сличните структури кои се против поддршката за Украина се и против Северна Македонија и преговорите со Европската Унија, напомена вицепремиерот.
- Ова е заедничка задача и од наша и од бугарска страна, да не дозволиме сите овие спорови во наредниот период да станат уште поголема препрека, бидејќи тоа дефинитивно ќе влијае долгорочно и на нашите односи, но и на идните односи во Унијата и регионот, посочи Маричиќ.
Според него, она што мора да се истакне за кризата во Украина е тоа што покажа дека во ова време е тешко да се остане неутрален и практично ги притисна сите држави на Европа да заземат јасен став.
Северна Македонија, потенцира вицепремиерот, е меѓу првите држави кои ја осудија агресијата на Украина, ги прифати санкциите кои ги воведе Европската Унија и стопроцентно се усогласи со надворешната политика на ЕУ.
„Балканскиот форум за интеграција 2022“, организиран од Фондацијата Фридрих Еберт и Европското движење во Црна Гора, се одржуваше во Подгорица, Црна Гора, од 17 до 18 ноември 2022 година.
Вицепремиерот за европски прашања, Бојан Маричиќ, учествуваше онлајн, а негови соговорници беа Ранко Кривокапиќ, поранешен претседател на Собранието на Црна Гора, Весна Пусиќ, поранешна пратеничка во хрватското Собрание, поранешниот министер за надворешни работи на Босна и Херцеговина, Игор Црнадак, и Бошко Јакшиќ, новинар и колумнист. мч/
![](/articles/images/d0bcd0b0d180d0b8d187d0b8d19c-d0bdd0b0-d0b1d0b0d0bbd0bad0b0d0bdd181d0ba/qJ3rz2Rek/placeholder.webp?use_watermark=0)