Мелбурн, 14 март 2025 (МИА) - Шарл Леклер со Ферари постигна најбрзо време на вториот слободен тренинг пред неделната воведна трка во Формула 1 за Големата награда на Австралија.

На патеката „Алберт Парк“, Леклер го постави најбрзиот круг за 1:16.439 минути, победувајќи ги двата болиди на Мекларен за помалку од две десетинки од секундата. Австралискиот миленик на публиката Оскар Пјастри беше втор со 0,124 секунди заостанување, а Британецот Ландо Норис беше трет со 0,141.

Тимот на РБ покажа многу добро темпо во втората сесија, ставајќи ги своите пилоти на четвртото и шестото место. Јапонецот Јуки Цунода заврши четврти, со 0,345 секунди зад Леклер, додека францускиот дебитант Исак Хајар заврши шести, со 0,580 секунди зад него.

Седумкратниот светски шампион Луис Хамилтон, кој оваа сезона вози за Ферари, беше за точно 0,420 секунди побавен од неговиот тимски колега Леклер и заврши петти. Макс Верстапен, актуелниот светски шампион, заврши само седми, со 0,624 секунди заостанување зад најдоброто време.

Претходно во текот на денот, Ландо Норис постави најбрзо време на првиот тренинг, запирајќи ги хронометрите на 1:17.252 минути. Втор беше Шпанецот Карлос Саинц Јуниор, кој во зима премина од Ферари во Вилијамс, а Леклер беше трет. дс

Фото: Архива